រុស្សី៖ អាជ្ញាធរសុខាភិបាលរុស្សី នៅថ្ងៃព្រហស្បតិ៍ម្សិលមិញនេះបានបន្តរាយការណ៍ពីករណីអ្នកស្លាប់ឡើងដោយសារកូវីដ-១៩ ខ្ពស់បំផុតចំនួន ៣ថ្ងៃជាប់ៗគ្នា ស្របពេលដែលអត្រាឆ្លងថ្មីនៃវីរុសកូវីដ-១៩ ប្រភេទដែលតាមានការកើនឡើង និងអត្រាកំណើននៃអ្នកចាក់វ៉ាក់សាំងមានភាពយឺតយ៉ាវ។

រដ្ឋាភិបាលរុស្សីបានប្រកាសពីចំនួនអ្នកស្លាប់ថ្មីចំនួន ៨៦៧នាក់ និងមានអ្នកឆ្លងថ្មីចំនួន ២៣,៨៨៨ករណីក្នុងរយៈពេល ២៤ម៉ោងចុងក្រោយ ដែលនាំឱ្យមានអត្រាអ្នកស្លាប់សរុបកើនឡើងដល់ ២០៧,២៥៥នាក់ ដែលជាតួលេខប្រទេសមានអ្នកស្លាប់ខ្ពស់បំផុតដោយសារកូវីដ-១៩ នៅអឺរ៉ុប។ 

អ្នកជំនាញឯករាជ្យបានចោទប្រកាន់ និងដាក់បន្ទុកទៅលើអាជ្ញាធរថាមើលស្រាលភាពធ្ងន់ធ្ងរនៃការផ្ទុះនៅវីរុសកូវីដ-១៩ក្នុងស្ថានការណ៍នេះ ខណៈអ្នកនាំពាក្យវិមានក្រឹមឡាំង លោក Dmitry Peskov បានទទួលស្គាល់ថា អត្រាអ្នកចាក់វ៉ាក់សាំងនៅរុស្សីនៅមិនទាន់ដល់គោលដៅដែលរដ្ឋាភិបាលចង់បាននៅឡើយ។ លោក Peskov បានថ្លែងប្រាប់អ្នកសារព័ត៌មានថា៖ "រដ្ឋាភិបាលត្រូវបន្តពន្យល់យ៉ាងសកម្មដល់ពលរដ្ឋថា វិធីតែមួយគត់ដែលជួយសង្គ្រោះជីវិតមនុស្ស និងដោះស្រាយបញ្ហាបានគឺការចាក់វ៉ាក់សាំងឱ្យបានគ្រប់គ្នា"។

រុស្សីគឺជាប្រទេសដែលរងគ្រោះធ្ងន់ធ្ងរជាងគេលំដាប់ទី ៥ លើពិភពលោក ដែលមានចំនួនអ្នកឆ្លងសរុបប្រមាណ ៧លានករណី ដែលចំនួននេះបានកើនឡើងខ្លាំងនៅរយៈពេលប៉ុន្មានខែចុងក្រោយនេះ។ រដ្ឋាភិបាលក្រុងម៉ូស្គូ បានព្រមានពីការផ្ទុះខ្លាំងនៃកូវីដ-១៩បំលែងខ្លួនថ្មី ជាពិសេសការព្រួយបារម្ភចំពោះបញ្ហាសុខាភិបាលផងដែរ។ 

មកដល់បច្ចុប្បន្ននេះ បើតាមសារព័ត៌មានក្នុងស្រុក Gogov របស់រុស្សីបានឱ្យដឹងថា ប្រជាជនរុស្សីប្រមាណ ២៩ភាគរយប៉ុណ្ណោះនៃចំនួនប្រជាជនសរុបជាង ១៤៦លាននាក់បានទទួលវ៉ាក់សាំងបង្ការជំងឺកូវីដ-១៩៕